كلام في الديكور ... أنت تسأل و المهندسة نانسي تُجيب, توريطه

كاتب هذا الموضوع هو أحد أعضاء منتدى محاورات المصريين والذي يريد أن ينهل من علمكم الغزير وخبرتكم العريضة - حوالي 3 متر - في مجال الديكور ..

فلا يخفى على أحد الدور الذي يلعبه الجمال في حياتنا ... والجمال يبدأ من حيث المكان الذي نعيش فيه - ما عدا اللي ساكنين إيجار جديد ... وبالتالي عايزين من حضرتك بعض الأفكار الجريئة والجديدة في ديكورات المنازل .. ويا حبذا بعض المواقع الإنترنتية المُهتمة بهذا الموضوع .. ولا سيما إن معظمنا خيبه في المواضيع دي وبيضرب أخماس في أسداس لو حب يبيض أوضة في الشقة حتى - ما عدا زميلنا الحاج ماجد أبو طاقيه اللي ما شاء الله عليه شكله إيده طايلة في المواضيع دي -

وأسمعي مني هذه القصة الإنسانية عشان أصعب عليكي وأشجعك على الكلام

العام الماضي إتصلت بي أختي التي تقيم في الدنمارك منذ فترة طويلة ... وقالت لي إنهم الصيف ده - اللي فات يعني - هايوضبوا شقتهم اللي أخدوها جديد في عباس العقاد فعلى طول قلت لها طيب لازم تتفقوا مع مكتب ديكور وتقولوا له على الأفكار اللي في دماغكو وهو يعرض عليكو أفكار جديدة متنوعة وفي الأخر تتفقوا على الشكل النهائي .. وما تنسيش تعملوا عقد بينكم وما تنسيش برضوا تحطو شرط جزائي بحيث لو أخل بالعقد أو بالديكور المتفق عليه تروحو مخزقين له عين من عيونه وتسيبو له التانية عشان يتحسر على اللي إتخزقت ... فقالت لي لأ جوزي مصمم إنه يشرف على العملية بنفسه خلال شهرين الأجازة اللي نازلينهم وهو هاوي الحاجات دي .. وأنا كمان ده أنا حتى بقيت لهلوبه في الدهانات وبقيت أعرف أزرع شجر وورد في الجنينة ... وأسكت بقيت كمان أعرف أجيب بوهيه وأدهن سور الجنينه .. قلت لها سور جنينة إيه وسور الأزبكية إيه ؟ فوقوا بقى من الرومانسية الحالمة اللي إنتوا فيها دي .. يا ماما سوق الصنايعيه في مصر والوطن العربي بشكل عام مليان وحوش كاسرة ومصاصين دماء .. وإنتي وجوزك هاتعلموا لي فيها عبد الحميد حافظ وزهرة العُلا يبقى هاياكلوكو ويحلو بهدومكو .. خصوصاً إن شكلكو مدي على فرافيري وأخدتو على العيشة الهنية في الدول الأسكندنافية .. وبعدين أساساً إنتوا حدودكوا مدينة نصر ولو روحتو لحد العباسية كنتو بتقولوا يا غربتي ياما .. يبقى سيبوكو من السكة البطالة دي وسيبوا العيش لخبازة .. يومين تلاتة وسي الأفندي أتصل بيه وقال نفس البؤين وأنا صايع .. إنت ماتعرفنيش .. وأسأل عليه في سراج مول .. ده انا بأنيم مدينة نصر من المغرب ..وأعرف أتعامل مع بتوع طايفة المعمار .... قلت له طب يا قيور أما نشوف وبكره أتفرج عليك وأنا بأكركر ..

المهم نزلول أجازة وراحوا سايبين شقتهم الأساسية اللي في مدينة نصر برضوا بس بعيد شوية عن الشقة الجديدة وأجروا شقة مفروشة لازقة في الجديدة عشان يبقوا في موقع الأحداث .. نزلت أنا وكل ما أروح عندهم ألاقي حبيبنا لابس الشورت والفانلة الكت وماشي لي في الشارع زي تامر حُسني قب لما يتسجن و عمال يشتري في طلبات ومون وبوهيات وحركات .. بعد إسبوع لقيناه متخانق مع مبلط السيراميك .. قال ليه وليه ماجاش الخميس والجمعه راح عامل له كمين يوم السبت قدام البيت ومجهز له حساب الشغل البسيط اللي عملها ومشيله العده وراميه في الشارع .. وراح إتفق مع واحد تاني يكمل الشغل ..

من غير ما أطول عدوا الشهرين وسافروا وسابوا لي أنا واخويا المفاتيح عشان البهوات الصنايعيه يكملوا الشغل اللي ناقص ... ومشي صاحبنا ودموعه على خده من اللي حصل له وفعلاً كان قرب يغير هدومه ببيجاما مقطعه ويقف ينظم المرور في مصطفى النحاس من اللي شافه من الصنايعية وسنينهم

مش بس كده ... اقسم بالله الشقة شفتها اساساً على المحاره وكان تقسيمها ومساحتها مبهرين .. اصبحت عبارة عن لوحه سيرياليه تعبر عن الصراعات الداخلية في مداخيل الإنسان البدائي ... وقلت يا خسارة الفلوس اللي راحت في الأرض ويا خسارة العاهات المستديمة اللي حصلت فيها .. على سبيل المثال راح إبننا اللي عايش بالعقلية الأوروبية يشتري شويه سيراميك على حركات من السلاب اللي في مكرم عبيد .. وعدى على البيت يقيل شويه من التعب رجع لقى السباك عامل مًصيبه سودا في الشقة .. فاليوم ده كان بيركب فيه البيه الصرف بتاع الشقة فالعقل بيقول إنه لازم يظبط منسوب مواسير الصرف الأرضية مع إرتفاع الأبواب الخشبية راح فاتي فتوى غير شرعيه ومعلي المنسوب زيادة عن اللازم وباالتالي البلاط لازم يعلى ولازم يتشال من الأبواب من تحت بالفاره عشان تبقى مريحه .. إيه اللي حصل بقى ؟ في حمامين بتوع غرف النوم اللي منفصلة عن الشقة وكلها في مستوى تاني مرتفع بنطلع له بسلمتين ظُراف .. فالبلاط بعد ما علي بقت راس الواحد تخبط في الكمره اللي فوق السلمتين لإنهم بقدرة قادر زادوا إتنين كمان .. وبقى كل واحد طالع أو نازل يدعي بُحرقه على سباك الغبره اللي شوه نصر الشقة تقريباً بغباءه ..

فأنا مع المثل اللي بيقول إدي العيش لخبازة ولو أكل نصفه .. ومكاتب الديكور حراقه شويه لكن هما الخبازين .. خصوصاً لما بنتكلم عن شقة محترمة الواحد صارف عليها قد كده ...

فياريت بقى تتبحبحي معانا كده وتقولي لنا شويه افكار يستفيد منها الجميع ولكي الأجر والثواب ...

إمضاء

شكرا عليــــ الموضوعـــــــــــ

يسلموووووو ع المرور